လူတိုင်း သဘာဝအလျောက် အချို ဓာတ်ကို ကြိုက်နှစ်သက်ကြပါတယ်။ အချို့ ကတော့ သာမန်ထက်ကိုပိုပြီး အချိုကြိုက် လွန်းတဲ့ သူတွေလည်း ရှိပါတယ်။
အချိုတွေ အစားများရင် ကျန်းမာရေး ကို ထိခိုက်စေနိုင်ပါတယ်။ ယခုဖော်ပြမဲ့ ဆောင်းပါးမှာတော့ အချိုကြိုက်လွန်းသူတွေ အချိုမကြိုက်အောင်လုပ်နိုင်တဲ့ နည်းလမ်း လေးတွေ တင်ပြထားပါတယ်။

(၁) အချိုဖြေဆေးရှိသလား
အချိုဓာတ်ကို အဆိပ်ကဲ့သို့ သဘောထားပြီး ဖြေပေးခြင်း Sugar Detox ဆိုပြီး ပြောနေကြတာရှိပါတယ်။ အချိုကို အငမ်းမရ ဖြစ်နေ သူတွေ၊ အချိုမစားချင်တော့အောင် လုပ်ပေးတယ်လို့ဆိုပါတယ်။ အဲဒါ တကယ်လုပ်ဖြစ်ပါရဲ့လား။ ကိုယ်အလေးချိန် ကျစေနိုင်ပါ့မလား။

(၂) သင်ဟာ တကယ့်ကို အချိုမစားရမနေနိုင် စွဲနေသလား
လူအချို့ဟာ သကြားဓာတ် ပါဝင်သော အချိုပါသော အစား အသောက်များကို ကျန်းမာရေးနှင့် မညီညွတ်သော နည်းလမ်းများဖြင့် စားသောက်နေကြပါတယ်။ သို့တိုင်အောင် အဲဒါဟာ တကယ့်ကို အချို မစားရမနေနိုင် စွဲလမ်းနေတာ မျိုးမဟုတ်ပါဘူး။ သင်က အချို စားချင် စိတ်ပေါ်လာတယ်။ စိတ်ကို ထိန်းမရတော့ဘူး။ ဒါနဲ့ပဲ ပိုစားမိ သွားတာ ပါ။ ဆေးလိပ်တို့၊ အရက်တို့လို စွဲတာမျိုးမဟုတ်ပါဘူး။

(၃) အချိုလိုအပ်တဲ့ ဦးနှောက် ကလာပ်စည်းများ
အချိုသကြားဓာတ်သည် ဦးနှောက်အတွင်း၌ရှိသော ကလာပ် စည်းတိုင်းအတွက် လောင်စာဖြစ်ပါတယ်။ သင့်ရဲ့ ဦးနှောက်က အချိုသကြားဓာတ်ကို ဆုလာဘ်အဖြစ် မြင်ပါတယ်။ ဒါ့ကြောင့် သင့်ကို အချိုတွေပိုပြီး လိုချင်စိတ် ဖြစ်ပေါ်စေပါတယ်။ တကယ်လို့ သင်ဟာ အချိုသကြားတွေ အမြောက်အမြား မကြာခဏ စားလေ့ရှိသူဖြစ်လျှင် သင်ဟာ အဲဒီဆုလာဘ်ကို ပိုပြီး အားဖြည့်ပေးသလို ဖြစ်သွားပါတယ်။ အလေ့အထဖြစ်သွားရင် ရပ်တန့်ဖို့ခဲယဉ်းတတ်ပါတယ်။

(၄) သကြားဓာတ် မြင့်တက်သွားခြင်း
နေ့လယ်ခင်းပိုင်းအချိန် သကြားလုံး သို့မဟုတ် အချိုပါသော မုန့်တစ်ခုခုကို စားဖို့အတွက် ဘာ့ကြောင့် သင် အလျင်စလို ဖြစ်နေ ရပါသလဲ။ အဲဒီအစားအစာထဲမှာပါတဲ့ သကြားက ရိုးစင်းသော ကစီဓာတ် (simple carbohydrate) တစ်ခုဖြစ်ပါတယ်။ သွေးထဲ ရောက်သွားရင် ဂလူးကို့စ်အဖြစ် လျင်မြန်စွာပြောင်းလဲသွားနိုင်ပါ တယ်။ သင့်ရဲ့ သွေးတွင်းသကြားဓာတ်ပမာဏကလည်း ရုတ်တရက် ထိုးတက်သွားပါလိမ့်မယ်။ ရိုးရှင်းသော ကစီဓာတ်များကို ဟင်းသီး ဟင်းရွက်တွေ၊ သစ်သီးဝလံတွေ၊ နို့ထွက်စားစရာတွေမှာလည်း ပါဝင်တတ်ပါတယ်။ ဒါပေမဲ့ အဲဒီအစားအသောက်တွေထဲမှာ အမျှင်ဓာတ်နဲ့ အသားဓာတ်လည်း ပါဝင်ပြီး ဂလူးကို့စ်အဖြစ် ပြောင်းလဲမှုကို နှေးကွေးစေပါတယ်။ ဒါပေမဲ့ အချိုဖျော်ရည်တွေ၊ အချိုအနှစ်တွေ၊ သကြားလုံးတွေ၊ စားပွဲပေါ်တင်ထားတဲ့ သကြား အမှုန့်တွေကတော့ အမျှင်ဓာတ်တွေ မပါပါဘူး။ သွေးထဲရောက် တာနဲ့ တစ်ပြိုင်နက် ဂလူးကို့စ်အဖြစ် အမြန်ဆုံးပြောင်းလဲ သွားပြီး သွေးတွင်းသကြားဓာတ် ထိုးတက်သွားပါလိမ့်မယ်။

(၅) သွေးတွင်းသကြားဓာတ်ကျဆင်းခြင်း
သင့်ရဲ့ ခန္ဓာကိုယ်က ဂလူးကို့စ်ဓာတ်များကို သွေးထဲကနေ ကလာပ်စည်းတွေထဲအတွင်းသို့ ပို့ဆောင်ပေးဖို့ လိုပါတယ်။ သို့မှသာ ကလာပ်စည်းများအတွက် စွမ်းအင်ရရှိမှာဖြစ်တယ်။ ဤကဲ့သို့ ပြုလုပ်နိုင်ရန်အတွက် ပန်ကိရိယလို့ခေါ်တဲ့ မုန့်ချိုအိတ်က အင်ဆူ လင်ဟုခေါ်သော ဟော်မုန်းတစ်မျိုးကိုထုတ်ပြီး အဲဒီဟော်မုန်းရဲ့ အကူအညီနဲ့ ကလာပ်စည်းထဲကို ဂလူးကို့စ်တွေ ဝင်ရမှာဖြစ်တယ်။ ကလာပ်စည်းများထဲသို့ ဂလူးကို့စ်တွေ ဝင်သွားတဲ့အခါ သွေးတွင်း သကြားဓာတ်ပမာဏလည်း ကျဆင်းသွားတယ်။ ဤကဲ့သို့ လျင်မြန် သော သွေးတွင်းသကြားဓာတ် ပြောင်းလဲမှုက သင့်အား တုန်တုန်ယင် ယင် ဖြစ်စေပြီး အချိုဓာတ်တွေ စားချင်စိတ် အငမ်းမရ ဖြစ်တဲ့စိတ် တွေ ဖြစ်လာစေတယ်။ ဘာ့ကြောင့်လဲဆိုတော့ သွေးတွင်းသကြား ဓာတ် ပမာဏပြန်ပြီး မြင့်လာအောင် အချိုတွေ စားချင်စိတ်ပေါက် လာရခြင်း ဖြစ်ပါတယ်။ ဒါကြောင့် နေ့ခင်းပိုင်းအချိန် သကြားဓာတ် စားပေးခြင်းဟာ သင့်အား ပို၍ဆိုးဝါးသော အချိုဓာတ် စားသုံးမှုဖြစ် စေလေ့ရှိပါတယ်။

(၆) ကော်ဓာတ်များသည်လည်း သကြားဓာတ်နဲ့ တူတယ်
သင်ဟာ အချိုမကြိုက်တဲ့သူ တစ်ဦးလို့ ကိုယ့်ဘာသာကိုယ် ထင်ထားတယ်ဆိုပါတော့။ ဒါပေမဲ့ သင်ဟာ အာလူးချောင်းကြော် တွေ၊ အကြော်အလှော်တွေကို စားချင်စိတ်ပေါ်နေပါသလား။ အဲဒီ အစားအစာတွေကလည်း ကော်ဓာတ်ပါသော ရှုပ်ထွေးကာဗွန် ဟိုက်ဒြိတ်များဖြစ်ပြီး ၎င်းတို့ဟာ သွေးထဲရောက်သွားတဲ့အခါ ရိုးရှင်း သော သကြားဓာတ်များအဖြစ် ဖြိုခွဲခြင်းခံရမှာ ဖြစ်ပါတယ်။ ဒါ့ကြောင့် ကော်စေးဓာတ်ပါသော ကစီဓာတ်တွေ စားတယ်ဆိုရင် သင့်ရဲ့ သွေးတွင်းသကြားဓာတ်ဟာ အချိုသကြားစားသလိုပဲ ဖြစ် လာမှာ ဖြစ်တယ်။ နမူနာကတော့ ဆန်ဖြူဖြူဖွေးဖွေးတွေ၊ ဂျုံဖြူဖြူ ဖွေးဖွေးတွေပဲ။ နူးညံ့နေအောင် ဖွပ်ထားသော ပေါင်မုန့်ဖြူ၊ ခရက်ကာ မုန့်၊ ပါစတာမုန့်စတဲ့ စားစရာတွေဟာ အဆိုးဆုံးဖြစ်တယ်။

(၇) အချိုဖြေပေးတဲ့ အစားအစာတွေ အလုပ်ဖြစ်ရဲ့လား
အချိုစွဲတဲ့အကျင့်ကို ဖြတ်ဖို့ဆိုပြီး ကြိုးစားနေပါသလား။ အချို့က ရှိသမျှ အချိုတွေအားလုံး ရှောင်ဖို့ပြောလေ့ရှိကြပါတယ်။ ဆိုလိုတာက အားလုံးသော သစ်သီးဝလံတွေ၊ နို့ထွက်စားစရာတွေ၊ ဖြူဖွေးနူးညံ့ နေအောင် ဖွပ်ထားသော နှံထွက်စားစရာတွေအားလုံး ရှောင်ခိုင်းလေ့ ရှိကြပါတယ်။ အဓိပ္ပာယ်ကတော့ သကြားနဲ့ ပတ်သက်တဲ့ ဖြစ်စဉ်တွေ ကို တားဆီးဖို့ပါပဲ။ တကယ်တော့ ဤကဲ့သို့ ရှိသမျှ အချိုတွေ အားလုံးရှောင်ခိုင်းတဲ့နည်းက လက်တွေ့ကျင့်သုံးဖို့ ခဲယဉ်းပါတယ်။ ရေတိုကာလအတွက်လောက်သာ အသုံးဝင်ပြီး မကြာခင်မှာ အရင် အတိုင်း ပြန်ပြီးစားမိတတ်ကြပါတယ်။

(၈) သင့်ရဲ့ လျှာပေါ်က အရသာခံအဖုလေးတွေကို ပြန်လည် လေ့ကျင့်ပေးပါ
တကယ်တော့ သင်ထင်ထားသလောက် သကြားအချိုဓာတ် တွေ သင့်ခန္ဓာကိုယ်အတွက် မလိုအပ်ပါဘူး။ တကယ်တော့ သင့်ရဲ့ အရသာခံအဖုလေးတွေကို မချိုသော စားစရာများကို ကြိုက်နှစ်သက်လာအောင် လေ့ကျင့်ပေးလို့ရတယ်။ အပတ်စဉ် အချိုပါသော စားစရာတစ်ခုစီ ဖြတ်တောက်သွားလိုက်ပါ။ နမူနာ အားဖြင့် ညစာစားပြီး အချိုပွဲစားတဲ့အကျင့် ဖြတ်လိုက်ပါ။ သင် နေ့စဉ်သောက်တဲ့ ကော်ဖီ၊ လက်ဖက်ရည်ထဲမှာ သကြားဓာတ် လျှော့ထည့်ပါ။ အချိန်ကြာလာသည်နှင့်အမျှ သင့်ရဲ့ အရသာခံ အဖုလေးတွေက သကြားဓာတ်အရသာကို အများကြီး မလိုတော့ တာ တွေ့ရပါလိမ့်မယ်။

(၉) ကောင်းသောအချိုများ ရွေးချယ်ပါ
တကယ်တော့ သင့်အနေနဲ့ အချိုမှန်သမျှ ဖြတ်တောက် ပစ်ဖို့ မလိုပါဘူး။ အခြားသော အရင်းအမြစ်များမှ ရယူနိုင် ပါတယ်။ နမူနာအားဖြင့် လတ်ဆတ်သော ဘယ်ရီသီး၊ သစ်သီး အနှစ် စသည်တို့ကို သကြားအစား စားသုံးနိုင်ပါတယ်။ သစ်သီးခြောက်၊ အေးခဲထားသော သစ်သီးများ၊ အချိုဓာတ် ထပ်ဖြည့်ထားခြင်းမရှိသော စည်သွတ်သစ်သီးဘူးများ အစား ထိုး သုံးစွဲနိုင်ပါတယ်။ အဆီဓာတ် လျှော့ထားသော နို့ တစ်ဖန်ခွက် သို့ မဟုတ် သကြားမပါသော ဒိန်ချဉ် တစ်ခွက် သောက်နိုင်ပါတယ်။

(၁၀) ခြေလှမ်းအသေးလေးများဖြင့် စတင်ပါ
သင့်အနေနဲ့ ကိုယ်စားမဲ့ အစားအသောက်ပုံစံကို ရိုးရိုးလေး အသေးအမွှားပြောင်းလဲမှုလေးများဖြင့် စတင်ပါ။ အဲဒါက ပိုပြီး လိုက်နာဖို့လွယ်တယ်။ နမူနာအားဖြင့် သင့်ရဲ့ အစားအစာထဲမှာ ဟင်းသီးဟင်းရွက်နဲ့ သစ်သီးဝလံတွေ ပိုစားပေးပါ။ ရေများများ ပိုသောက်ပေးပါ။ အစားအသောက် ထုပ်ပိုးထားသော အညွှန်းကို ဖတ်ပြီး သကြားဓာတ်အများကြီးမပါသည့် စားစရာမျိုးကို ရွေးချယ် ပါ။ တစ်ပတ်လျှင် သကြားနည်းနည်းစီလျှော့ချဖြတ်တောက် သွားပါ။ ရက်သတ္တပတ်အနည်းငယ်ကြာတဲ့အခါ သင်ဘယ်လောက် အထိ သကြားဓာတ်ကို လျှော့ချပစ်လိုက်နိုင်ပြီလဲဆိုတာ အံ့ဩဖွယ် တွေ့ရလိမ့်မယ်။

အယ်ဒီတာ