မိမိစားနေကျ နံနက်စာထဲမှာ ပါဝင်သော စားသောက်ဖွယ်ရာများက မွေးလာကတည်းက မိမိအိမ်တွင် မိသားစုအားလုံး စားလေ့ရှိသည့် နံနက်စာဖြစ်နေလျှင် ကျန်းမာရေးနှင့် မညီညွတ်ခဲ့ပါက ပြောင်းလဲ စားသောက်မယ်ဟု ဆုံးဖြတ်ရခြင်းဟာ နည်းနည်းတော့ အစပိုင်းမှာ အခက်အခဲရှိနိုင်ပါတယ်။
တချို့ကျတော့လည်း မိသားစုစားခဲ့တာမျိုးမဟုတ်ဘဲ အရွယ် ရောက်လာတော့မှ ကိုယ့်ဘာသာကိုယ် ကောင်းမယ်ထင်သလို အဆင်ပြေသလို စားကြတဲ့ အစားအစာတွေလည်းရှိပါတယ်။ နမူနာ အားဖြင့် ကော်ဖီလေးတစ်ခွက်လောက်နဲ့ ဒိုးနတ်မုန့်လေးတစ်ခု လောက် သို့မဟုတ် ကိတ်မုန့်လေးတစ်ချပ်လောက် စားပြီးတာနဲ့ အလုပ်ခွင်ကို သွားတော့တာမျိုးရှိနိုင်တယ်။ ဒါမှမဟုတ် ပဲပြုတ်ဆီဆမ်းထမင်း တစ်ပန်းကန်နဲ့ အကြော်လေးတစ်ခုတလေစားပြီး ကော်ဖီ သို့မဟုတ် လက်ဖက်ရည် တစ်ခွက်သောက်ကာ နံနက်စာပြီးတဲ့လူတွေလည်း ရှိတယ်။ အချို့က မိုးလင်းလာလျှင် မုန့်ဟင်းခါးတစ်ပွဲ ဒါမှမဟုတ် အီကြာကွေးတစ်ချောင်း၊ လက်ဖက်ရည်တစ်ခွက်နဲ့ လက်ဖက်ရည်ဆိုင်မှာ ကိစ္စပြီးလိုက်တာမျိုးလည်း ရှိနိုင်တယ်။
အဲဒါကို ကျန်းမာရေးနဲ့ ညီညွတ်တဲ့ နံနက်စာဖြစ်သွားအောင် ပြောင်းတဲ့နေရာမှာ အစီအစဉ်တစ်ခုတော့ ချဖို့လိုတယ်။ သင် ထင်သ လောက် မခက်ဘူးဆိုတာ တွေ့ရပါလိမ့်မယ်။
အခြေခံအားဖြင့် နံနက်စာမှာပါသင့်တဲ့ စားစရာတွေကတော့ whole grain ဟုခေါ်သော ဖြူဖွေးနူးညံ့နေအောင် ဖွပ်မထားသည့် ဆန်ကြမ်း၊ ဂျုံ ကြမ်းတို့ဖြင့် ပြုလုပ်ထားသော မုန့်စားစရာတစ်ခုခု၊ အဆီမပါ အရေခွံမပါ အသားသက်သက် နှင့်သစ်သီးဝလံတို့ပဲဖြစ်ပါတယ်။
နမူနာအားဖြင့် whole grain ဖြင့် ပြုလုပ်ထားသော ပေါင်မုန့်တစ်ချပ်၊ သဘာဝမြေပဲ ထောပတ် (peanut butter) စားပွဲတင်ဇွန်းတစ်ဇွန်းနှင့် ငှက် ပျောသီးသေးသေးတစ်လုံးဆို လျှင် လုံလောက်ပါပြီ။
မြန်မာလိုဆိုလျှင်လည်း ဆန်လုံးညို လုံးတီးဆန်လို ဆန်မျိုး၊ ကော်ဖီပန်းကန်နှင့် တစ် ခွက်စာ၊ ပဲပြုတ်ဆီဆမ်း၊ ကြက်ဥ ပြုတ် သို့မဟုတ် ကြက်ဥကြော် တစ်လုံး၊ ငှက်ပျောသီးငယ် တစ်လုံးဆိုလျှင် ရပါတယ်။ ကော်ဖီ သို့မဟုတ် လက်ဖက်ရည် တစ်ခွက်ကိုတော့အဆီလျှော့နို့စိမ်းနှင့် သကြားမပါဘဲသောက်နိုင်ပါတယ်။
ဖော်ပြခဲ့တာကတော့ နမူနာမျှသာဖြစ်ပါတယ်။ အလားတူ ပုံစံမျိုးကိုအသားနှင့်သစ်သီးဝလံ တို့ ပါဝင်စေပြီး ပြောင်းလဲ စား သုံးနိုင်ပါတယ်။

 

မောင် (ဆေးတက္ကသိုလ်)